आज साँझ गएको शक्तिशाली भूकम्पबाट काठमाडौंको लैनचौरस्थित बेलायती दूतावासको पर्खाल भत्किंदा घाइते भएका चार जना मध्ये तीन जनाको मृत्यु भएको छ । मृत्यु हुनेहरुमा गुल्मी स्थायी घर भएका बाबु छोरी साजन श्रेष्ठ र अनिता श्रेष्ठ छन् भने अर्का एक मृतकको पहिचान खुल्न सकेको छैन । वेलायती र भारतीय दूतावासबीच रहेको खोंचको बाटो हुँदै मोटर साइकलमा गईरहेको बेला एक्कासी पर्खाल भत्किंदा उनीहरु किचिएका थिए । उनीहरु चढेको मोटरसाइकल पनि पूर्ण रुपमा क्षतिग्रस्त भएको छ भने सोही ठाउँमा अन्य सवारी साधन पनि क्षतिग्रस्त भएका छन् । काठमाडौं उपत्यका लगायत देशैभर र भारतका उत्तरपूर्वी राज्यहरुमा महसुश गरिएको भूकम्प साँझ ६ बजेर २७ मिनेट जाँदा गएको थियो भने भूकम्प ६ दशमलव ८ रेक्टर स्केल मापन गरिएको छ । यो भूकम्प विक्रम सम्वत् १९९० को भूकम्पपछिको सवैभन्दा ठूलो हो ।
भूकम्पको केन्द्र विन्दु पूर्वी नेपालको ताप्लेजुङ जिल्ला र भारतीय राज्य सिक्कीमको सिमानामा रहेको जनाइएको छ । भूकम्पको झट्का पूर्वबाट पश्चिमतर्फ गएको थियो । रामेछापको एकजना घाइते भएका छन् भने एउटा घर भत्एिको जनाइएको छ । गुम्देल, जुडुवा लगायत गाविसहरुमा पनि घर भत्किएको जनाइएको छ । स्याङ्जाको दशथुममा एक घर र लमजुङको बाहुन डाँडामा पनि घर भत्किएको प्रारम्भिक जानकारी प्राप्त भएको छ । भूकम्पले सडकमा गुडिरहेका गाडी समेत हल्लिएका थिए । भूकम्पबाट के कति क्षति भयो भन्ने विवरण आएको छैन । भूकम्पको झड्का उत्तर भारतीय राज्यहरु र नयाँ दिल्लीमा समेत गरिएको थियो । भूकम्प गएपछि मानिसहरुमा अहिले त्रास बढेको छ भने कतिपय मानिसहरु घरभित्र जान सकिरहेका छैनन् । आज आएको भुकम्प ९० सालको भुकम्पपछिको ठूलो भएको भुकम्प मापन केन्द्रले जनाएको छ । वि.सं. १९९० साल माघ २ गते ८ दशमलब ४ र २०४५ साल भदौ ५ गते ६ दशमलब ६ रेक्टर स्केलको भुकम्प आएको जनाइएको छ । सो बेला हजारौ मान्छेको मृत्यु भएको थियो ।
